Pagsakay og traysikol sa Minglanilla ipaagi na unya sa app

CEBU, Philippines —  Gipanglantawan nga hi-tech na unya ang pagsakay og traysikol sa Lungsod sa Minglanilla human ang lokal nga kagamhanan nipadayag og suporta sa SEND IT app.

Si mayor Rajiv Enad nianunsyo niini human sa ilang panag-estorya ni Marlon De Jesus, representante sa SND IT Express Corporation.

Ang SEND IT mobile application usa ka bag-ong paagi sa pag-book og sakay sa traysikol.

Gani lakip sa serbisyo niini ang express delivery, pabili services ug food delivery.

Matud ni Enad nga sa ingon niini nga paagi malikayan na unya ang overcharging sa pletehan. Gawas pa niana, makahatag usab ang mobile application sa seguridad sa sumasakay, anti-colorum, pagmenos sa trapiko ug uban pa.

Si Enad nipasalig sa iyang suporta ug ang mobile application ipresentar usab kini sa konseho sa lungsod. — BDB (BANATNEWS)