Sec ug PIA moabag sa kampanya batok investment scam

CEBU, Philippines — Nipirma og kasabotan ang  Securities and Exchange Commission-Cebu Extension Office (SEC-CEO) ug  Philippine Information Agency-Central Visayas (PIA-7) nga  mas mopalig-on sa kampanya alang sa  promosyon sa financial literacy sa mga Filipino ingon man usab pakigbatok sa investment scams.

Nitambong sa pinirmahay mao sila si SEC-CEO Director Sheara L. Lupango-Tamayo ug PIA-7 Head Fayette C. Ri?en kinsa nitataw nga  palig-onon ang SEC Capital Market Promotion ug Advocacy Inter-Agency Network o SEC CAMPAIGN Network.

Ubos sa SEC Communication Advocacy Network (SEC-CAN!), ang maong mga ahensya    magtinabangay o mag-inambitay   sa mga programa  o sa  nagkadaiyang pamaagi sa  pakigbatok sa mga scam .

Pinaagi sa PIA-7, makab-ot ang mas lapad ug epektibo nga pagsabwag sa impormasyon sa mga programa, proyekto ug serbisyo sa gobyerno ngadto sa publiko pinaagi sa lain-laing plataporma niini ug sa aktibong pakigtambayayong sa mga local government units ug uban pang ahensya sa gobyerno.

Mapasalamaton si Lupango-Tamayo ngadto sa PIA-7 gumikan kay maghatag gyud og kaayohan sa katawhan ang ilang partnership.

Dugang pa ni Lupango-Tamayo nga importante kaayo ang pagsabwag sa impormasyon aron malikay ang katawhan sa lain-laing matang sa pagpangilad. 

Niadtong Abril karong tuiga, malampusong gilusad ang SEC CAMPAIGN Network uban ang siyam ka extension offices sa nasud ug ang ilang tagsa-tagsa ka kauban gikan sa pribado ug publikong sektor ubos sa ilang geographical jurisdiction.

Ang PIA-7 mao ang unang ahensya sa linya sa gobyerno sa SEC CAN! SEC-CEO network ug ang pinakabag-o nga dugang sa SEC-CEO partners nga naglakip sa mga pribadong organisasyon sama sa Junior Chamber International Mandaue Chapter, Talisay City Chamber of Commerce and Industry, Inc. ug ang Sustainable Energy and Enterprise Development for Communities (SEED4COM) –MEL (BANATNEWS)