Pahasubo kang Labella nagbaha

CEBU, Philippines — Mga supporters ug kahigalaan nga wala makatambong sa funeral rites sa mitaliwang si Mayor Edgardo Labella ug kadtong mga miagwanta sa pagpaabot sa kilid sa kadalanan nga giagian sa funeral convoy mipadayag sa ilang gibati sa pagtaliwan niini pinaagi sa paghilak ug pag-post diha sa social media. Sa pagabot palang sa foot procession gikan sa Cebu City Hall padulong sa Metropolitan Cathedral daghang mga Sugbuanon ang nagpaabot kaniya diha sa dalan ug sila naghilak nga gianugonan sa sayong pagtaliwan niini.  Nagsuot sila og puti ug ang uban nagdala og mga puting balloons ug placards nga pagpasalamat sa mayor ug pagpaabot sa ilang pagmahal ngadto sa nitaliwang lider.

Samtang sa social media , nagbaha usab ang mga pahasubo sa mayor.

Sa Facebook Live sa Cebu City Public Information Office, dunay higayon niabot sa kapin sa 7 mil kapin ka live viewers sa iyang paglubong.

Matud pa sa iyang public information officer nga si Razel Cuizon nga dili gyud makalimot si Labella nga personal nga magpasalamat kanunay sa iyang mga tawo matag human sa ilang mga kalihokan. —IBM (BANATNEWS)