Misa de Gallo padugangan ni Zafra og schedule

CEBU, Philippines — Girekomendar gihapon ni Konsehal Phillip Zafra nga dugangan ang mga schedule sa  Misa de Gallo.

Matud ni Zafra nga mao kini ang iyang gihisgotan sa initial nila nga tigom kauban ang pipila ka representante sa simbahan.

Nasayran nga nagmalampuson ang maong sestema sa Misa de Gallo sa niaging tuig tungod kay mabahin ang mga tawo ug dili na kini magdumog sa simbahan.

Sa maong pamaagi, aduna na unya’y misa sa gabii gawas sa naandan nga misa sa kadlawon.

Nasayran nga sa Misa de Gallo sa niaging tuig kasagaran sa mga simbahan nipahigayon og duha ka schedule sa gabiii ug laing duha ka schedule sa kadlawon.

Ang mga nangulo sa tagsa-tagsa sa ka parokya giawhag nga mopahigyaon gihapon og live streaming sa mga misa gumikan kay adunay ubang parokyano nga magpanagana gihapon nga mogawas sa balay ug dili gihapon komportable nga ma-expose sa mga tawo. Sa laing bahin, ang pangulo sa Market Operations Division (MOD) Cebu City Irvin Cabales nibutyag nga si Cebu City Acting Mayor Michael Rama nagpatawag og meeting sa niaging semana ug ilang gituki ang mahitungod sa “Pasko sa Carbon”.

Matud ni Cabales nga kadtong plano nila kaniadto nga parol making ipabilin gihapon nila.

Ang dakong kausaban lang nga mahitabo kon mabalhin na ang mga manindahay diha sa ML Quezon, himuon nila ang lugar nga sentro sa mga kalihokan kalabot sa kasaulogan sa pasko.

Dugang ni Cabales nga daghan sila og kalihokan nga giplano alang na unya sa kasaulogan sa Pasko sa Carbon.

Gipahibawo sab niini nga ang Megawide Construction Corporation mosuporta sa mga kalihokan sa siyudad sama sa mga premyo ug uban pa nga gikinahanglan.

Gipasabot ni Cabales nga kada anaa sila’y mga kausaban sa ilahang plano diha sa Carbon Public Market ipatawag dayon nila ang mga manindahay aron masayod usab sila sa ilang mga angayang buhaton ug uban pa. Decemay P. Padilla/BDB (BANATNEWS)