600 ka balay gilaomang ma-turnover sa San Remigio

CEBU, Philippines — Gilaoman ang dugang kapin sa 600 ka bag-ong balay ang i-turnover sa Lungsod sa San Remigio sa dili pa matapos karong tuiga.

Kini ang gibutyag ni San Remigio Mayor Mariano Martinez nga nahinabi sa Banat News.

Matud ni Martinez nga anaa na sa 85 porsyento ang trabaho sa 617 ka panimalay ug gipaabot kini nga i-turnover sa kataposang quarter karong tuiga.      

Nasayran nga ang maong mga panimalay alang kini sa mga biktima sa bagyong Yolanda ug sa mga konstituwente sa lungsod nga anaa nagpuyo sa danger zone.

Mapasalamaton si Martinez sa unang hugna sa mga balay nga ilang na-turnover sa nilabay’ng mga semana ngadto sa mga recipient.

Dugang ni Martinez nga dako kaayo og tabang ang maong mga panimalay nga hingpit na gayud nga naangkon sa mga biktima sa bagyong Yolanda niadtong tuig 2013. (Rowena D. Capistrano/BDB)

Serbisyo alang sa mag-uuma gibuksan sa Brgy Taptap

Gibuksan na dili pa lang dugay ang Extension Field Office sa Cebu City Agriculture Department (CAD) didto sa Barangay Taptap.

Gituyo kini aron mas dali nga maabot ang mga serbisyo alang sa mga mag-uuma sa bukirang bahin sa Dakbayan sa Sugbo. 

Ang mga serbisyo nga gidalit sa lokal nga kagamhanan mao ang libreng pagparehistro sa mga mag-uuma o ang Registry System for Basic Sectors in Agriculture (RSBSA), Libreng Insurance sa tanum, hayop, mais ug bukawan, Technical Assistance ug ang Libreng planting materials (Herbal and Ornamental Seedlings).

Giawhag usab sa kagamhanan nga magpadayon ang pagsunod sa health protocols sa higayon nga mobisita kini sa ilang buhatan isip usa sa pamaagi nga malikayan ang transmisyon sa COVID19. MEL (BANATNEWS)