Tulo nanghasi sa lodging house
Cebu, Philippines — Tulo ka mga lalaki ang gidakop sa kapolisan human sila nanghasi sa usa ka lodging house kay wala mosugot ang nagbantay nga mo-checkin silang tulo sa usa lang ka lawak kauban ang tulo ka mga babaye.
Kini nahitabo sa Hidden Lodge diha sa Malazarte St. Brgy. Pari-an sa Dakbayan sa Sugbo niadtong Biyernes sa gabii.
Ang gidakop sa kapolisan mao silang Casan Ampuan, 27, taga Marawi City, Jay-r Tujan, 26, taga Bantayan ug si Jay Balderas, 34, taga Negros Oriental.
Matud pa ni Police Staff Sergeant Artemio Hernandez, Desk officer sa. Pari-an Police Station nga nakahinabi sa Banat News, nakainom ang tulo ug nagdala sila og tagsa-tagsa ka mga babaye. Ang tulo nikuha og kwarto para kanila kauban ang tulo ka mga babaye apan apan wala mosugot ang roomboy hinungdan nga nasuko sila ug nagsugod dayon panghasi.
Ang usa misumbag sa bungbong samtang ang usa nakiglalis sa room boy nga niresulta sa komosyon.
Matud pa nga nanggawas ang tulo sa lodging house apan ang usa ka kanila namato sa lodging house ug naigo sa ulo ang usa ka parking attendant sa iyang ulo kinsa nakaangkon og samad ug gidala sa tambalanan.
Ang mga estambay sa lugar pagkakita sa gibuhat sa tulo migukod kanila hinungdan nga naglumba sila og panagan padung sa Pari-an Police Station apan didto gidakop hinuon sila tungod sa reklamo. (BANAT NEWS)
- Latest
