Sonny Osmeña nitaliwan na

CEBU, Philippines — Nitaliwan na ngadto sa laing kalibutan si kanhi senador ug Toledo City mayor John Henry “Sonny” Osmeña sa edad nga 86-anyos.

Ang pangulo sa Toledo City Community Affairs and Development Ferliza Contratista maoy nikompirmar niini pinaagi sa iyang facebook post nga naglakbit usab sa mensahe sa igsuong babaye ni Osmeña nga si Annie Osmeña-Aboitiz.

Nasayran nga si Osmeña nitaliwan kini ngadto sa laing kalibutan niadtong Martes sa alas 2:45 sa hapon diha sa gipuy-an niini sa Maryville Condominium sa Siyudad sa Sugbo ug gi-cremate dayon ang iyang patayng lawas.

Sa oras sa pagsuwat niining balita wala pay detalye sa hinungdan sa kamatayon ni Osmeña.

“A holy mass through zoom will be announced soon”, tipik sa mensahe sa igsuon ni Osmeña.

Gikataho nga sa niaging tuig gipahibalo ni Osmeña nga naghambin siya og stage 2 cancer ug nipaubos siya og chemotherapy sessions sukad niadtong tuig 2019.

Igsuon ni Osmeña ang kanhi gobernador sa Sugbo nga si Emilio “Lito” Osmeña ug ilahang ig-agaw si kanhi Cebu City mayor Tomas Osmeña ug kanhi senador Sergio Osmeña III.

Anak siya sa magtiayong Emilio Osmeña ug Ma. Louisa Rennern ug natawo niadtong Enero 17, 1935.

Nagsugod ang iyahang political career niadtong tuig 1963 dihang napili siya pagka-konsehal sa Siyudad sa Sugbo hangtud nga nahimo siya nga bise mayor niadtong tuig 1968.

Niadtong tuig 1969 napili siya nga  kongresista  ug nagsilbi siya nga officer-in-charge mayor sa Cebu City  niadtong tuig 1987.

Niadtong tuig 1995 si Osmeña napiling kongresista sa ikatulong distrito ug taas-taas usab nga panahon nga nahimo siya nga senador gikan sa tuig 1971 hangutd sa 1972; 1987 hangtud sa 1995, ug 1998 hangtud sa 2004.

Napili usab siyang mayor sa Dakbayan sa Toledo niadtong tuig 2013 hangtud sa 2019. Subay niini, si Senate President Vicente Sotto III nipadangat kini sa iyang pahasubo.

“Senator Sonny was a very astute and savvy legislator. I am honored to have worked with him in the 9th and 10th Congress. He was a Cebuano legislator par excellence!”, matud ni Sotto.

Gideklarar usab ni Cebu City Mayor Edgar Labella ang siyudad isip “citywide period of mourning” sugod kagahapon hangtud sa Pebrero 5, 2021 gumikan sa kamatayon ni Osmeña.

“I am deeply saddened to learn of the passing of former senator John Henry “Sonny” Osmeña. We have lost another great statesman and staunch advocate against corruption in public service”, matud ni Labella.

Si Labella nagkanayon nga dili niya makalimtan ang kontribusyon ni Osmeña diin usa kini sa mga naghulma sa Department of Energy, Electric Power Crisis Act, ug Build-to-Operate Act. —BDB (BANATNEWS)