Simbahan mipagawas na og lagda sa misa de gallo

Cebu, Philippines — Mipagawas na og lagda alang sa pagpahigayon sa Misa de gallo si Cebu Archbishop Jose Palma nga gipahaum sa Executive Order no. 111 nga gipagawas ni Mayor Edgardo Labella.

Kini ang gipahibawo ni Father Japeth Geonzon, Vice Chair sa Commission on Worship sa Archdiocese of Cebu ug suma pa niini nga ang maong lagda maoy tumanon sa tanang simbahan sa siyudad.

Suma pa ni Fr. Geonzon nga diha sa Cebu Metropolitan Cathedral ilang ipatuman ang “first come, first serve” diin unahon pagpuno ang sulod sa simbahan sa required capacity, ug kadtong mauwahi adto ibutang sa gawas.

Usa ka misa ang mahitabo sa Cathedral sanglit ang gitugot nga oras sa siyudad alang niini gikan sa alas 4 sa kadlawon hangtod sa alas 6 sa buntag mao nga nakadesidir sila nga sugdan ang misa alas 4:30 sa kadlawon.

Hinoon, ang simbahan dunay pagahimoon nga simbang gabi, anticipation sa Misa de Gallo nga magsugod karong Desyembre 15 sa alas 6 sa gabii gikan sa Lunes hangtod sa Biyernes ug alas 5:30 sa hapon sa Sabado ug Dominggo.

Gipahimangnuan usab sa arsobispo ang mga kaparian nga bawal ang pagpahigayon sa mga motorcade ug bisan unsa nga procession.

Samtang gipahibawo usab ni Alvin Santillana sa pangu sa CDRRMO sa Dakbayan sa Talisay  nga andam na ang mga simbahan sa siyudad sa pagpahigayon og misa de gallo sunod semana.

Kini human sa ilang gihimong pag-inspeksyon sa napulo ka simbahan sa Talisay ug nasuta na nila ang ka-andam niini.

Base usab sa executive order ni Mayor Jonas Cortes sa Dakbayan sa Mandaue dili tugtan nga makatambong sa misa de gallo ang mga nagpanuigon og 15 anyos paubos ug ang 65 anyos pataas, ingon man ang dunay sakit ug ang mga buntis. — Rowena D. Capistrano, Gabriel Bojoc, Romeo T. Limpangog (BANAT NEWS)