Mga street vendors ipahimutang sa usa ka lugar
CEBU, Philippines — Gipaneguro sa kagamhanan sa Dakbayan sa Sugbo nga hapsay ang sestema sa mga street vendor ilabi na sa umaabot nga Fiesta Senior kong ugaling tugotan kining makatinda sa sunod tuig. Matud ni Konsehal Philip Zafra sa Dakbayan sa Sugbo nga kong itugot na sa sunod tuig nga makatinda ang mga street vendor ipahimutang sila diha sa usa ka lugar aron dili magkatag diha sa kadalanan.
Nasayran nga panahon nga magsingabot ang Fiesta Senior adunay mga vendor nga motungha ug maninda alang sa maong okasyon.
Gibutyag ni Zafra nga atol sa ilang tigom tali sa ubang hingtungdan nasabotan nga ang lugar nga butangan sa mga vendor anha diha dapit sa nahimutangan sa building sa Compania Maritima.
Ang tumong niini nga mamentinar ang physical distancing ug makontrolar usab ang gidaghanon sa mga tawo nga mosulod diha sa lugar.
Dugang ni Zafra nga dili angayang mokompiyansa aron malikay sa COVID-19 ug gikatakda ang pag-umol sa mga guideline human unya sa mga konsultasyon. BDB (BANATNEWS)
- Latest
