Mas gustong magpabilin sa GCQ

CEBU, Philippines — Mas gusto ni Cebu City Mayor Edgardo Labella nga magpabilin lang una gihapon ubos sa general community quarantine ang siyudad sugod Agosto 15, apan mag-agad siya kun unsay rekomendasyon unya sa Inter-Agency Task Force (IATF) kun paubsan pa kini ngadto sa modified GCQ.

Nasayran nga pila na ka adlaw nga padayon ang pagkubos sa gidaghanon sa mga natalang bag-ong kaso sa COVID-19 dinhi sa siyudad base sa datos sa Department of Health (DOH)-7.

Si Labella miingon nga dako ang tsansa nga ma-downgrade ang quarantine status sa siyudad apan mas gusto niini nga magpabilin lang una karon sa GCQ aron mas makontrolar pa og kadiyot ang lihok sa mga tawo ug mas moobserbar pagsunod sa minimum health protocols.

Gusto unta, apan…

“Well of course we will be happy if there’s going to be a downgrade to modified general community quarantine but if you ask me I would rather that we maintain the General Community Quarantine status because there is better control in movement of people,” pasabot ni Labella.

Matud sa mayor naleksiyon na sila niadtong unang gipaubos sa GCQ ang siyudad diin misaka gyud ang kaso sa COVID-19  tungod sa mga kalihokan sa mga tawo nga wala motuman sa mga lagda.

“After all they can still go out but when you speak of quarantine would simply mean stay home. You only have to go out if there’s compelling reason like essential goods and medicines for you to go out because the virus is still very much around,” dugang sa mayor.

Multa ug pagkapriso

Nasayran nga duna nay ordinansa nga napasar nga magpahamtang og silot sa mga molapas sa quarantine guidelines, sa first offense P1,500 nga multa og pagkapriso sulod sa 30 ka adlaw, sa second offense P3,000 ug pagkapriso sa 30 ka adlaw nga silot, ug third offense P5,000 nga multa ug pagkabilanggo sulod sa 30 ka adlaw.

Bisan si Police Regional Office 7 director Police Brigadier General Albert Ferro gusto nga magpabilin pa sa GCQ ang dakbayan hangtud sa bulan sa Septiyembre aron mas mapakubsan pa og maayo ang tsansang mosaka ang mga kaso.

Tungod sab niini, malimitahan ang lihok sa mga tawo ug mas masayon kanila ang contact tracing sa mga tawong uwahing nakauban sa mga nagpositibo sa sakit ug mabuwag dayon sila gikan sa kinabag-an.

Di kakompiyansahan

Matud sa heneral, di kakumpiyansahan ang maong sakit mao nga kinahanglan gyud mosunod ang mga tawo sa health protocols.  “I recommend that GCQ will still remain until September, but still it’s depend on the decision and assessment from our IATF and I hope dili na ta mobalik pa sa ECQ, and I am thankful on how the Cebuano react and cooperate as they follow health protocol and strict stay at home policy,” matud pa ni Ferro.

Patutokan sab ni Ferro ang tulo ka urbanized city sa Central Visayas kun sa Metro Cebu nga gilangkuban sa Mandaue, Lapu-Lapu ug Cebu City nga dili na mosaka pa ang mga kaso tungod kay mao kini ang mga dapit nga dunay daghang mga tawo ug sentro sab kini sa mga patigayon.

Si Ferro dako ang pagsalig nga kayang buntogon sa mga Sugboanon ang COVID-19 kun magtinabangay lang ang tanan.

Dako sab ang pagpasalamat ni Ferro sa mga sakop sa Police Regional Office 6 ug PRO 8 nga mipadala sa ilang mga sakop dinhi aron pagtabang sa pagbantay. Sheriza Mae Uy/IBM (BANATNEWS)