Drayber sa PUJ buot na mobalik og pamasada

CEBU, Philippines — Pipila ka drayber sa Public Utility Jeep (PUJ) nga taga Dakbayan sa Talisay ang nanghinaot nga makabalik na usab sila sa ilang pagpamasada.

Usa ka drayber sa PUJ nga si “Edward” nitug-an sa DYSS Super Radyo nga lisod na gyud ang ilang kahimtang ilabi na nga wala pa sila kabalik sa pagpamasahero.

Si Edward nihangyo kang Mayor Gerald Anthony “Samsam” Gullas Jr. nga unta matabangan sila sa ilang kahimtang.

Sa iyang bahin, si Gullas nagkanayon nga wala niya gipasagdan ang sektor sa drayber sa PUJ sa siyudad.

Ug gani gihangyo na niya ang Land Transportation Franchising and Regulatory Board (LTFRB)-7 kabahin niini.

“We are fighting to allow na gyud but LTFRB is not allowing PUJ pa”, matud ni Gullas.

Matud ni Gullas nga padayon nila nga gi-follow-up ang maong buhatan sa iyang hangyo.

Sa laing bahin, nikabat ngadto sa 775 ang naisyu nga special permit sa LTFRB-7 ngadto sa mga Public Utility Bus nga nagbiyahe sa tibuok Central Visayas.

Kini ang gitug-an ni LTFRB-7 Regional Director Eduardo Montealto Jr. atol sa virtual press conference kagahapon sa buntag. Gawas niini, nikabat sa 2, 848 ka taxi units ang nahatagan usab nila og special permits ug 107 ka units sa Transport Network Vehicle Service (TNVS).

Matud ni Montealto nga adunay mga terms and conditions ang ilang gipatuman ngadto sa mga taxi nga naglankub sa cashless transactions diin adto na sila mobayad sa ilang plete pinaagi sa online transactions.

Si Montealto nagkanayon nga giuna nila karon sa paghatag og permit ang mga PUB ug modernized standardized public utility jeepney, uv express dayon ang traditional jeepney base sa hierarchy. Sa Dakbayan sa Sugbo adunay gigahin nga 130 ka PUB ug modernized jeepney apan sa pagkakaron ni-deploy pa sila og 55 ka units.

Dugang ni Montealto nga padayon sila nga nakadawat og application sa mga determined routes ilabi na ubos pa sa general community quarantine (GCQ) ang Central Visayas. Rowena D. Capistrano/BDB (BANATNEWS)