Nanunggab sa silingan, pagkahuman naghikog

CEBU, Philippines — Usa ka lalaking giingong dunay kakulian sa pangisip kalit nga gidunggab ang silingang ginang ug pagkahuman nag-unay kini pagdunggab sa iyang kaugalingon nga niresulta sa iyang kamatayon diha sa Sitio Casia sa Barangay Lanao sa lungsod sa Daanbantayan niadtong miaging adlaw.

Depression ug problema sa pangisip ang gituohang hinungdan nga nabuhat Edelberto Condeno, 52, ang krimen sa silingang si Melissa Reyes, 26.

Matud ni Police Captain Ian Macatangay nga pasado alas-7 sa buntag samtang nagpakaligo og bata si Reyes kalit lang nga miduol si Condeno ug gidiretso kini og dunggab sa nagkalain-laing parte sa lawas.

Sumala pang Macatangay, human gidunggab sa suspek ang biktima gidunggab sab dayon ni Condeno ang iyang kaugalingon.

Dugang pa ni Macatangay nga nabantayan sa kabanay ug silingan nga pila na ka adlaw nga magsige og inusara si Condeno. Matud pa nga mamuhatay og higdaanan si Condeno apan gumikan sa gipatumang enhanced community quarantine wala na kini makagawas sa ilang lugar.

Sumala pa nga naglingkod si Condeno sa iyang tugkaran sa dihang nakita niini ang biktima ug anak niini, gituohan nga gisamokan ang suspek nagtan-aw maong gihimo niini ang krimen.

 “Dugay na daw na siya nga nabatayan nga mag inusara, siguro gisamokan siya nga nakit-an ang biktima iya dayon giduol,”saysay pa ni Macatangay.

Gibutyag sab niya nga pila na ka tuig ang milabay dihang na diagnose nga adunay ‘nervous breakdown’ si Condeno kansang banay naglisud sab ang kabutang ug nadugangan pa niining krisis sa COVID-19 nga halos wala na kini mapakaon sa pamilya.

Hinuon anaa na sab sa luwas nga kahimtang si Reyes human nga maka angkon kini og samad dinunggaban sa nagkalain-laing parte sa iyang lawas. Romeo Limpangog/IBM (BANATNEWS)