Health care workers nanawagan og respeto

CEBU, Philippines — Nanawagan ang mga health care workers og respeto kanila sa katawhan niining panahon sa gubat batok sa coronavirus disease.

Kini atol sa programa sa Vicente Sotto Memorial Medical Center diin gipakita sa social media subay sa shout out sa katawhan ngadto sa mga frontliners diin gipakita ang mga pasalamat pinaagi sa mensahe, drawing ug video.

Ang programa gidumala nila ni Atty. Rey Cris Panugaling sa Office of Strategy Management, ug Dr. Helen Madamba, OB-GYN Infectious Disease Specialist sa VSMMC. Sa wala pa ang programa sa shout out sa mga frontliners, gipahinumduman nila ni Panugaling ug Madamba ang katawhan nga angayan respetuhon ang mga nurses ug doctors human usa ka nurse ang giingong na-trauma dihang gipalayas sa ilang compound.

Ipresentar unta ang maong nurse apan tungod kay giingong na-trauma pa kini sa iyang kasinatian dihang gibuk-an og botelya sa gawas sa ilang lugar.

Gipasabot ni Madamba nga ang mga health care workers adunay gipanggamit nga personal protective equipment sa ilang pag-atiman sa mga pasyente.

Sumala pa ni Madamba nga basin ang maong mga health care workers mao ra usab ang makasalbar sa ilang kinabuhi.

Dugang ni Madamba nga ang gamay nga gugma taas kini og padulngan. Samtang si Panugaling nibutyag nga sila sa VSMMC ug ubang mga tambalanan dili na motugot nga aduna pay susama nga nurse nga mahimong biktima.

Dunay balaud

Ilang gipahinumduman ang katawhan nga adunay Magna Carta for Public Health Workers nga naghatag og silot sa malapason samtang adunay ordinansa ang Dakbayan sa Sugbo nga gikalipay sa mga health workers kay magprotekta usab kini kanila batok sa diskriminasyon.

Si Konsehal Dave Tumulak ang nangamahan sa maong ordinansa nga gitumong aron paghatag og proteksiyon sa mga frontliners.

Mao sama sa nurses, doctors, nagtrabaho sulod sa hospital nga naglakip sa janitor, tig-serve og pagkaon sa tambalanan, kapolisan, volunteers, peace auxiliaries, barangay tanods, barangay health emergency response team ug kadtong mga nag-serve og pagkaon nga abli karon.

Matud ni Tumulak nga warning kini sa tanang magyaga-yaga sa mga frontliners dungan sa pagbutyag nga angayan huna-hunaon nga ang mga frontliners gikonsiderar nga modern heroes maong kinahanglan ampingan, pasalamatan ug dili bugal-bugalan ilabi na nga girisgo nila ang ilang kinabuhi alang sa kaayuhan sa tanan.

Ubos sa maong ordinansa, ang masakpan pamultahon og P1,000 ug pagkapriso ug usa ngadto sa 30 ka adlaw sa unang kalapasan, P3,000 nga multa ug pagkapriso og 30 ka adlaw sa ikaduha ug P5,000 nga multa ug pagkapriso og 30 ka adlaw sa ikatulo.

Subay niini, si Cebu City Police Office Director Hector Grijaldo nibutyag nga nadawat na nila ang maong ordinansa aron ipatuman. Decemay P. Padilla/GMR (BANATNEWS)