Mga biktima sa sunog sa Tipolo nangayo og panabang

CEBU, Philippines – Nangayo og panabang sa konseho sa Dakbayan sa Mandaue ang 47  ka pamilya nga biktima sa sunog sa niaging tuig sa Sitio  Maharlika,  Barangay Tipolo  aron sila makaangkon og luna sa relocation site o ilang kabalhinan.

Ang maong mga biktima sa sunog kinsa nitambong sa regular session niadtong Lunes  aron ipadangat ang ilang yangongo ang kasamtangan nga nagpuyo diha sa  Cebu International Convention Center (CICC).

Si Mylene Argawanon kinsa usa  sa mga biktima maoy nagbasa sa gihan-ay nilang sulat sa grupo alang sa pagpadangat  sa ilang yangongo nipasabot nga ang  P5,000 nga financial assistance nga gihatag kanila niadtong Septiyembre  2019 dili paigo. Matud ni Argawanon nga tinguha nila ang pagbalik sa pagtukod sa ilang panimalay diha sa luna nga ilang gipuy-an. Si  Tony Pet Juanico,  pangulo  sa Mandaue City’s Housing and Urban Development Office (HUDO)  kinsa nitambong usab  sa maong sesyon ang natingala sa gipadangat  nga yangongo  ni Argawanon diin gikataho nga usa man kini  sa  beneficiaries.

Si Argawanon nipasabot nga igo lang siyang sa nagpakisayod ug tuyo usab niya ang kasiguroan  sa ilang pagbalik  sa luna nga kanhi nila gipuy-an.

Hinuon gipaniguro ni Juanico nga kadtong beneficiaries nga nakapa-validate ngadto   sa HUDO ang labing siguro nga malakip sa gitanyag nga relocation site sa kagamhanan.

Sa laing bahin, nikabat sa P80 mil ang gibana-bana nga danyos sa sunog nga niulbo diha sa Sacred Heart Village, Banawa,Barangay Guadalupe, Dakbayan sa Sugbo niadtong Lunes sa hapon. Ang sunog gituohan nga nagsugod sa panimalay nila ni Annabel Kim ug walay gikataho nga naangol o nakalas sa maong insidente.

Si Senior Inspector Arnel Abella nagkanayon nga ipaubos pa nila sa imbestigasyon ang hinungdan sa sunog. Rowena D. Capistrano/BDB (BANAT NEWS)