Kapilya ni Santa Teresa de Avila gisubhan

CEBU, Philippines – Liboan ka magtutuo ang nagtapok sulod sa bag-ong kapilya ni Santa Teresa de Avila sa Valladolid, Carcar City alang sa blessing niini ug Santos nga Misa nga gipangulohan ni Cebu Archbishop Jose Palma.

Gitambungan sab kini sa mga obispo sa nagkadaiyang Dioceses, mga monsignor, kaparian ug kamadrehan gikan sa nagkadaiyang suok sa kalibutan.

Atol sa Santos nga Misa gihimo ang pagbendisyon sa bag-ong kapilya nga mas daku kini ug daghan na nga mga tawo ang masulod.

Ang Arsobispo nitug-an nga ang pagkonsagrar sa bag-ong kapilya ipahigayon atol unya sa sumad sa kamatayon ni Obispo Teofilo Camomot sa buwan sa Septiyembre.

Ang Arsobispo mapasalamaton sa katukuran sa maanindot kaayo nga kapilya ug niawhag sa mga magtutuo nga buksan kanunay ang kasingkasing sa Dios bisan taliwala sa daghan nga problema.

Dugang ni Palma nga kung sa uban mga nasud sirad-an ang simbahan tungod sa mga hulga sa mga sakit sama sa Coronavirus Disease, sa Sugbo bukas ang mga simbahan kay mas labi gikinahanglang karon ang pag-ampo.

Gidasig usab ni Palma ang mga magtutuo nga magmapasayloon sa isigkaingon ilabi na nga managsama ra nga makasasala ug ipatigbabaw kanunay ang gugma.

Samtang si Mother Maria Louella Grace Buscato, superior-general sa Daughters of Sta. Teresa, mapasalamaton sa tanan nga nahimong kabahin sa kalampusan sa katukuran sa maong kapilya. Gihatagan sab og plaque of appreciation ang chairman sa The Freeman ug Banat News nga si Jose “Dodong” Gullas nga gidawat sa kapikas niini nga si Nena isip pasalamat sa congregation sa ilang tabang.

Gilaumon usab nga sa sunod tuig adunay dakung selebrasyon nga mahitabo tungod sa paglaum nga mahimong venerable si Archbishop Teofilo Camomot. /GMR (BANAT NEWS)