Haya molapas 9 ka adlaw susihon sa kapolisan

CEBU, Philippines – Dili mosugot ang Cebu City Police Office nga adunay sugal nga himuon sa haya sa patay ug pag-inom sa mga barangay sa dakbayan.

Kini ang gibutyag ni CCPO Director Engelbert Soriano bisan daghan ang wala kauyon niini.

Kabahin kini sa pagpanghingusog ni Police Regional Office 7 Director Albert Ferro batok sa ilegal nga sugal ug drugas sa tibuok Central Visayas.

Matud ni Ferro nga motugot siya nga adunay magdula og baraha apan usa lang ka lamesa alang sa kalingawan sa mga tawo nga mobilar sa patay.

Walay lamesa ibutang

Apan si Soriano sa iyang bahin niingon nga kung mahimo wala lay lamesa nga ibutang tungod kay makaintriga kini sa kapolisan.

Matud ni Soriano ug Ferro nga nasabot sila nga ang sugal atol sa haya sa patay usa na ka kultura sa mga Pilipino ug makatabang sa gasto sa pamilya.

Buot si Soriano nga ang bilar mahimong bonding sa mga kaila nga walay sugal.

Hugot sab nga ipatuman ni Soriano ang mga ordinansa sa Dakbayan sa Sugbo batok sa inom ug paghubog-hubog.

Gitataw sa kapolisan sa Central Visayas nga ang pagdili sa sugal sa mga haya sa patay dili kini pagdaut sa kultura sa mga Pilipino kung dili nagpatuman lang sila sa Presidential Decree1602.

Tinguha sab ni Soriano nga ipasusi ang mga haya nga molapas sa siyam ka adlaw sa pagduda nga gituyo kini aron nga mas motaas pa ang adlaw sa pagpanugal sa mga sugarol.

Palapdan ang deployment

Samtang gimanduan sa CCPO ang mga station commanders nga palapdan ang deployment sa mga polis sa kadalanan ilabi na sa lugar nga daghan og kaso sa pagpanglabni o pagpanulis.

Kini human nibalik na sad ang kaso sa pagpanglabni ug tulis sulod sa mga pangpublikong sakyanan.

“It’s time to rationalize our deployment sa ating mga personnel, and we will establish more dynamic deployment plan,” matud ni Soriano.

Dugang ni Soriano nga kinahanglan nga tun-an ang sitwasyon sa ilang tagsa-tagsa nga area of responsibility aron kini nga dali nga masulosyunan.

“It’s time to make diagnoses to solve the problem in their area of responsibilities,” dugang ni Soriano.

Subay niini giawhag ni Soriano nga magmabinantayon ang publiko sa ilang palibot ug dili magpasaya sa ilang mga mahalon nga kabtangan.

Sugyot ni Soriano ngadto sa publiko nga kinahanglan nga likayan nga hatagan og ideya o oportunidad ang adunay dautang tumong ug tuyo nga mabuhat kini aron malikayan nga mahimong biktima.

Gipasalig sab niya nga adunay dugang polis nga ipakatap sa kadalanan ug aduna sab mga plain clothes personnel gikan sa bag-o lang nga gibalik nga Theft and Robbery Section sa CCPO nga magsilbi nga tracker team sa mga kawatan. /GMR (BANAT NEWS)