Likayan ang pagtapok

CEBU, Philippines — Giawhag ni Mayor Gerald Anthony “Samsam” Gullas Jr. sa Syudad sa Talisay ang publiko nga likayan lang una ang mga kalihukan nga magpatapok og daghang tawo aron malikay ang tanan sa pagkatap sa 2019 novel coronavirus.

Si Gullas nihangyo ngadto sa mga barangay opisyales, midwives, city health ug sa mga kaparian nga ilang isabwag ang impormasyon kalikayan lang ang virus.

Asoy pa niya nga delikado kaayo ang virus para sa mga kabataan nga nagpangidaron og 10 anyos paubos, 60 anyos pataas ug sa mga tawo nga huyang ang immune system.

Ang barangay Mohon nagsaulog sa ilang kapistahan ni Sr. Sto. Niño sa miaging adlaw apan ang kalihukan sa simbahan wa kapugngi apan gipasidan-an nang daan ang mga tawo sa mga pamaagi aron malikay sa maong sakit.

Sa pikas bahin, ang kura paruko sa Santo Niño Parish Mohon Talisay Fr. Jonas Mejares miingon nga kinahanglang mosalig ang katawhan sa Balaang Bata kay mao kini ang labing gamhanang anti-virus.

Matud pa ni Mejares nga nahinabi sa Banat news, daghan na kaayong mga virus nga niagi sa Pilipinas ug sa Sugbo apan dili kini angay kahadlokan, giawhag niya ang tanan nga magampo kanunay. Rowena D. Capistrano/IBM (BANATNEWS)