TCPS nagpasalamat sa pagdayeg
CEBU, Philippines — Mapasalamaton ang hepe sa Talisay City Police Station sa mga opisyal nga nakakita sa ilang paningkamot sa subson nga operasyon batok sa ginadiling drugas.
Si Police Major Gerard Ace Pelare nagkanayon nga ang tabang ni Mayor Gerald Anthony “Samsam” Gullas Jr. ug sa konseho sa siyudad ang daku og natampo sa ilang mga kalampusan sa mga operasyon.
Gani si Bokal Raul Bacaltos sa unang distrito niduso og resolusyon sa hunta probinsiyal pagpasidungog sa kapolisan sa siyudad human nasakmit ang shabu nga kantidad og P5 milyones.
Sa buwan sa Enero, 118 ka tawo nga nalambigit sa ilegal nga drugas ang ilang nadakpan ug napasakaan og kaso samtang ang kinatibuk-ang ebidensya nga nakuha nibalor og P8 milyones.
Si Gullas ug si Pelare nibisita sa buhatan ni Presidential Assistant for the Visayas Michael Lloyd Dino aron ipahibawo ang ilang gihimo batok sa ginadiling drugas.
Kini aron mahibawo ang Presidente nga lahi na ang Siyudad sa Talisay ikompara sa niaging katuigan.
Gawas sa mga operasyon naghimo sab og mga programa ang kapolisan inubanan sa kagamhanan aron mapaduol ug makuha ang simpatiya sa katawhan. /GMR (BANATNEWS)
- Latest
