Duterte: Sugbo dako pa gihapon og problema sa illegal nga drugas
CEBU, Philippines — Subling namahayag si Presidente Rodrigo Duterte nga hangtud karon dako pa gihapon ang problema sa Sugbo sa illegal nga drugas.
“Ang drugas kusog pa kaayo sa Cebu,” matud pa niini kinsa midugang nga tungod sa illegal nga drugas daghang pamilya ang nangaguba.
Sama sa iyang naandan, mibahad ang pangulo niadtong mga nalambigit niini lakip na ang mga sakop sa kapolisan ug militar.
Samtang namahayag sab ang pangulo nga usa ra gyud iyang gipangita sa mga kawani sa gobiyerno, partikular niyang gilitok ang kapolisan ug militar nga kinahanglang sila “matinud-anon (honesty)” sa ilang panerbisyo.
Si Duterte namahayag niini atol sa iyang speech sa Cebu City Sport Complex sa pagsaksi niya sa Sinulog presentation kagabii. Kauban sa presidente silang OPAV Secretary Michael Lloyd Dino ug Senador Christopher Lawrence Go.
Sa pikas bahin, ang pagtudlo ni Presidente Rodrigo Duterte og bag-ong PNP Chief gipanglantawang makapahiusa sa maong organisasyon sumala pang Police Brigadier General Valeriano De Leon human ang pangulo mitudlo si Police Lieutenant General Archie Gamboa isip maoy pangu sa 180 mil nga kapolisan sa nasud. Si De Leon nagkanayon nga maayo kaayo nga balita alang kanila sa kapulisan ang gihimo ni Duterte aron matuldokan ang ilang kalibog kun kinsa ang sundon nga lider sa ilang organisasyon.
Matud pa niya nga maayo si Gamboa sa natad sa operasyon ingon man administratiba nga aspeto hinungdan nga daghan unya ang kausaban ang lauman sa ilang hanay.
Si Gamboa maoy nag officer-in charge sa PNP human sayong niretiro si kanhi PNP Chief Oscar Albayalde tungod sa kontrobersiya sa Ninja cops sa dihang siya pay provincial director sa Pampanga. Matud pa ni De Leon, praktikal nga lider si Gamboa base sa iyang naobserbahan makapila ka higayon nga siya nakatambong sa tigom nga gidumula sa naulahi.
Gipasalig ni De Leon ang siyento porsiyentong suporta sa bag-o nilang lider sa kapulisan.
Si Gamboa sakop sa Philippine Military Academy (PMA) Sinagtala Class 1986 nahimong deputy chiefs nilang kanhi PNP Chief ug karon Senador Ronald “Bato” dela Rosa ug Albayalde. (BANATNEWS)
- Latest