Palace of Justice ipaayo sa kapitolyo

CEBU, Philippines — Nagpaabot ang Kapitolyo sa tubag gikan sa Supreme Court kalabot sa sitwasyon sa Palace of Justice sulod sa Capitol compound. Si Gob. Gwendolyn Garcia nagkanayon nga walay klarong dokumento kalabot sa maong edipisyo nga naguba human sa linog niadtong tuig 2013.

“First wa gyud nay usufruct, wala man na nato gi-donate, wala gyud nay papeles, and nahitabo lang ana, estorya guro ang DOJ unya ang Supreme Court seguro nigasto, so ilang agreement. Karon nisulat ta sa DOJ kay wala naman ang mga fiscals toa naman sa DOJ nga building,” matud ni Garcia.

Kaniadto ang mga opisina sa korte sama sa regional trial courts, prosecutor’s office ug bisan ang Public Attorney’s Office maoy nag-okupar sa maong edipisyo.

Apan tungod sa linog namalhin ang mga buhatan sa judiciary department human kini gideklarar nga dili luwas nga sudlan.

Si Garcia nagkanayon nga una silang nisuwat sa DOJ kalabot sa maong edipisyo apan nitubag kini nga dili ilaha ang maong building ug adto mosulat sa Korte Suprema.

Matud ni Atty. Frank Dinsay, chief of staff sa gobernador, nga sa uwahi nilang nasayran anaa na sa lamesa ni SC Administrator Midas Marquez ang sulat sa Kapitolyo.

Naghulat ang gobernador sa tubag sa SC aron masayud sa sunod nga lakang sa Kapitolyo sa maong building.

Si Garcia nagkanayon nga ila kining ipatan-aw kun unsay mamahimong buhaton.  “First of all kinahanglan tan-awon ang structural integrity ana, kung unsay kinahanglanon, whether i-retrofit it or ato gyud na gub-on, magbutang ta og laing building,” matud ni Garcia.

“Kung kaya ra i-retrofit we will first tagaan nato og priority ang atong department kung kinahanglan additional office space and then we will allow other government agencies to rent the area,” dugang sa gobernador. –/GMR BANAT NEWS