Alcover, Ayuman gikiha og libel
CEBU, Philippines — Gipasakaan ni Konsehal Prisca Niña Mabatid og kasong libel ang duha ka kanhi kaalyado niya sa politika sa Dakbayan sa Sugbo.
Apil sa gikiha ang usa sa mga giingong biktima sa sexual harassment sa usa ka division head sa Cebu City Hall. Ang gikiha mao sila kanhi konsehal Pastor Alcover Jr. ug kanhi Apas barangay kapitan Ramil Ayuman.
Matud ni Mabatid nga nagplano pa siya og dugang napulo ka kasong cyber libel nga ipasaka batok kang Alcover and Ayuman.
Ang reklamante sa sexual harassment nibutyag nga wala siya kahibawo nga girekord ni Mabatid ang ilang panag-estoryahanay sa telepono nga gipabati sa konsehal atol sa iyang privilege speech sa hawanan sa konseho niadtong Martes.
Apan si Mabatid niingon nga iyang gipahibawo ang babaye nga iya irekord ang ilang panag-estoryahanay.
Si Ayuman sa iyang bahin niingon nga magpadala siya og suwat sa konseho aron mangayo sa kopya sa privilege speech ni Mabatid aron gamiton sa kalapasan sa anti-wiretapping law.
Matud sab ni Alcover nga gibali ni Mabatid ang isyu nga unta ang kaso nagtumong lang sa kasong sexual harassment batok kang Lorenzo Basamot kinsa division head sa Department of General Services.
Dugang ni Mabatid nga padayonon niya ang iyang pagpakig-away batok sa mga akusado. GMR (BANAT NEWS)
- Latest
