Housing units sa tinaan sugdan na

CEBU, Philippines — Gipaabot nga masugdan karong tuiga ang pagtukod sa 192 ka housing units alang sa mga biktima sa landslide sa Dakbayan sa Naga.

Kini ang gitug-an ni Constancio Atiniero, district manager sa National Housing Authority-Cebu District Office.

Matud ni Atiniero nga ang NHA ni-award na sa katukuran sa 192 ka housing units apan nagpaabot nalang sila sa compliance sa winning developer nga taga Sugbo sa ilang mga documentary requirements aron makapagawas na sila og notice to proceed.

Malaumon si Atiniero nga masugdan na karong tapos sa tuig ang proyekto nga kantidad og P90 milyones nga anaa mahimutang sa Balili property sa Barangay Tinaan.

Gibutyag ni Atiniero nga unom ka buwan ang pagtrabaho sa mga panimalay ug hinapos sa 2020 mahuman na.

Mismo si Presidente Rodrigo Duterte maoy nangulo sa ground breaking ceremony niadtong Septiyembre 6 human sa landslide sa Sitio Sindulan, Barangay Tinaan nga nikalas og dili mominus 70 ka tawo ug aduna pay mga natabunan. (/GMR)(BANATNEWS)