Midwife gipasanginlang namili og serbisyohan
CEBU, Philippines – Usa ka midwife sa Barangay Lawaan 1, Dakbayan sa Talisay ang gipasanginlang namili og serbisyohan.
Si Grace Badayos, hingkod ang panuigon, usa ka mabdos, residente sa Camella Homes, Barangay Lawaan 1 sa maong siyudad nireklamo batok kang Julie Abellana. Si Badayos ang magpa-prenatal unta kini apan giingong nibalibad si Abellana ug niendorso kaniya ngadto sa Barangay Maghaway.
Si Badayos niadto usab kini sa Barangay Maghaway tungod sa rekomendasyon ni Abellana apan gipabalik kini tungod kay ang iyang rehistro naa sa Barangay Lawaan 1. Ang reklamo ni Badayos naabot kang Mayor Gerald Anthony “Samsam” Gullas, Jr. hinungdan nga gipatawag sa naulahi si Abellana ug si Dr. Lino Alanzado, pangulo sa City Health Office.
Matud ni Gullas nga dili maayo ang gibuhat ni Abellana tungod kay sila trabahante sa katawhan ug dili kini angayang mobalibad sa mga tawo nga mangayo og tabang. Si Gullas nagkanayon nga sa unang adlaw niyang paglingkod sa pwesto gipahimangnoan na niya ang mga kawani sa gobiyerno nga mohatag og kinasing-kasing nga serbisyo ngadto sa katawhan.
Hinuon si Abellana niangkon nga aduna lang gyu’y wala pagkasinabtanay sa ilang boundary sa paghatag og serbisyo. (/BDB)(BANAT NEWS)
- Latest
