10,000 nikuyog sa Walk with Mary

CEBU, Philippines — Gibana-bana nga 10,000 mga magtutuo ug deboto sa Mahal nga Birhen Maria nikuyog sa Walk with Mary gikan sa Fuente Osmena padulong sa Plaza Independencia kagahapon sa kaadlawon subay iyang adlawng natawhan.

Adunay kapin sa 30 sa karo sa Mahal nga Birhen Maria nga adunay lain-lain nga titulo ug debosyon ang giprosesyondiin pag-abot sa Plaza Independencia gipahigayon ang Santos nga Misa nga gipangulohan ni Msgr. Joseph Tan, ang tigpamaba sa Archdiocese of Cebu.

Atol sa maong prosesyon, tanang pag-ampo ug rosary ang gipabati sa DyRF 1215 ug Power 89.1FM diin madungog sa kabalayan ug mga sakyanan.

Matud ni Tan nga angay ipakita sa kadaghanan nga ang paghigugma sa Mahal nga Birhen adunay kasegurohan ug gipakatawo niini ang Manunubos nga naghatag og kaluwasan ug kahupayan sa mga problema.

Ang Mahal nga Birhen nahimong instrumento sa daghang katawhan ug angayan pasalamatan ug sundon ang maayong mga mithi niini.

Si Tan niawhag sa katawhan nga dili gyud magpakawala sa paglaum ug kanunay gyud mosangpit sa Langitnon nga Inahan nga sa makanunayon andam motabang sa iyang tanang anak. Si Pj Ghunner Balasabas, COM-VMY Archdiocesan Council Chairman for Spirituality, mapasalamaton sa bagang duot sa katawhan nga niapil sa Walk with Mary nga nagklaro nga ang Pilipinas ilabi na sa Sugbo matawag og Pueblo Amante de Maria.

Ang hepe sa Waterfront Police Station Police, Major Joemar Pomarejos, nitug-an nga malinawon ra ang gipahigayon nga Walk with Mary. (/GMR)(BANATNEWS)