Billones iinstolar nga auxiliary bishop sa Sugbo

CEBU, Philippines – Liboan ka magtutuo ang nitambong sa episcopal ordination ni Most Reverend Midyphil Billones, DD didto sa St. Elizabeth of Hungary Metropolitan Cathedral sa Jaro, Iloilo City kagahapon sa buntag sa dili pa kini siya iinstolar isip Auxiliary Bishop sa Archdiocese of Cebu karon Septiyembre 26 sa Cebu Metropolitan Cathedral.

Nangulo sa maong Santos nga Misa sila si Archbishop of Manila Cardinal Luis Antonio Tagle; Apostolic Nuncio to the Philippines Gabriele Giordano Caccia; Archbishop Jose Palma sa Archdiocese of Cebu ug uban pa. Si Cardinal Tagle mapasalamaton sa pagdawat ni Billones sa iyang bag-ong tahas isip auxiliary bishop sa Sugbo.

Samtang si Palma mapasalamaton usab kini nga aduna na siya’y kaabag sa Archdiocese of Cebu ug malaumon usab siya sa umaabot nga adlaw mapun-an ang auxiliary bishop ug iyang pangandoy nga usa usab ka Sugbuanon.

Si Billones sa iyang bahin, nitug-an nga mapasalamaton ug excited siya sa iyang bag-ong mission nga gitahas kaniya.

Gitug-an ni Billones ngadto sa mga Sugbuanon nga dili lang siya mobalhin sa Sugbo mouli gayud siya tungod sa angga niya nga “Dodong” nga maoy tawag sa mga lalaki nga Sugbuanon.

Pipila ka Sugbuanon ang niapil sa episcopal ordination nga naglangkub sa chairman sa commission on the laity Fe Mantuhac-Barino. Si Billones mao usab ang nangulo sa commission on the laity sa Archdiocese of Jaro.

Si Barino nitug-an nga andam sila makigtrabaho sa bag-ong Obispo sa mga kalihukan ilabi na alang sa mga layko. (/BDB)(BANAT NEWS)