Lalaki giunay og dunggab sa kainom
CEBU, Philippines — Kritikal ang kahimtang sa usa ka lalaki human siya unaya og dunggab sa iyang kainom diha sa Sitio Laray, Barangay San Roque, Dakbayan sa Talisay kagahapon sa kadlawon.Ang biktima mao si Dexter Dadula, 40-anyos nagpuyo sa maong lugar.
Samtang ang suspetsado giila sa kapolisan nga si Marjun Norma, 30-anyos, usa ka laborer sa Dakay Construction, lumad nga taga Guihulngan, Negros Oriental.
Si Police Captain Nazarino Emia, deputy chief sa Talisay City Police Station nagkanayon nga nagkasabot nga mag-inom ang duha sa maong lugar.
Apan dihang nangahubog na kini wala na nagkasinabot ang duha hinungdan nga si Norma nibunot sa iyang gidala nga kutsilyo diha sa iyang hawak dayon hansak ngadto sa lawas sa biktima.
Naigo sa iyang dughan ug walang bahin sa iyang lawas ang biktima hinungdan nga gidali kini og dala sa tambalanan.
Samtang ang suspetsadp dali kining nisibat human sa maong hitabo ug padayong gipangita sa kapolisan. (BANAT NEWS)
- Latest
