Nigamit sa VECO gidakop

CEBU, Philippines – Gidakop ang usa ka nagpailang empleyado sa Visayan Electric Company (VECO) kagahapon sa buntag human nangilad.

Ang suspek giila nga si Raymond Samson, 28, taga Jugan, Consolacion, kinsa ang modus giingong moadto sa kabalayan nga sul-ob ang uniporme sa VECO ug ingnon ang tagbalay nga ang electric meter kinahanglang ibalhin ug maningil og bayad.

Si Gloria Arriola, 68, taga Sitio Tugasan, Guadalupe, Cebu City, nagkanayon nga nakabayad na siya og P4,000 sa P5,000 nga gisingil sa suspek ug kagahapon unta ang bayad sa balanse. Nagduda si Arriola nga ilad maong nanawag siya sa buhatan sa VECO ug nasuta nga dili empleyado si Samson.

Nunot niini nangayo og tabang ang biktima sa kapolisan atol sa ilang panagkita kagahapon ug sa suspek sa Sitio Guadalajara hinungdan sa pagkasikop ni Samson.

Giingong nagsugod ang modus sa suspek sa niagi pang tuig. (/GMR)(BANAT NEWS)