Bangi ni Radaza, Chan hayan modaku

CEBU, Philippines – Gipanglantawan karon sa mga Oponganon nga magkadaku ang panagsungi nilang Lapu-Lapu City Mayor Junard “Ahong” Chan ug kanhi Kongresista Paz Radaza.

Nagsugod ang ilang panagsungi sa wala pagtugyan ni Radaza sa yawe sa opisina sa iyang anak nga si kanhi kongresista Aileen Radaza sa ikaduhang andana sa City Hall.

Gumikan niini gimando ni Chan ang pagpaguba sa lock sa pultahan nga nakapahingangha sa mga staff ni Kong. Radaza sa ilang paghidangat nga abli na ang maong buhatan.

Si Chan maoy nagpaabli sa maong buhatan human sa iyang pagtambong sa flag raising ceremony niadtong Lunes sa buntag pinaagi sa paglugit sa lock sa luyong bahin sa buhatan sa kongresista.

Gipaablihan ni Chan ang maong buhatan tungod kay gamiton kini isip temporaryo  niyang opisina sanglit giayo pa ang buhatan sa mayor.

Si Radaza nagkanayon nga nakahimo og kalapasan ang mayor sa ordinansa sa dakbayan nga nagtugot sa pagbutang og opisina sa kongresista sa City Hall nga maoy iyang gibasehan nga dili kini makapapahawa kaniya. Ang legal officer sa dakbayan, Atty. James Sayson, nipadayag nga andam sila motubag kun modangop sa korte si Radaza. (/GMR)(BANAT NEWS)