Kamatayon ni Mayor Boniel gihandom

CEBU, Philippines – Gihandom sa pamilya ug mga higala ni kanhi Bien Unido Mayor Gisela Boniel ang ikaduha ka tuig nga kasumaran sa kamatayon niini diha sa kadagatan sa Barangay Caubyan,  Isla sa Olango  sa Dakbayan sa Lapu-Lapu.    

Si Boniel ang gikataho niadtong Hunyo 7, 2017 nga nilawig  sa kadagatan tadlas sa Mactan Channel  hangtud nga  nahidangat  sa kadagatan nga sakop na  sa Barangay Caubyan  sa maong lugar  gitambog  ang patay’ng lawas nga wala pa gayod igkita hangtud niining panahona.

Ang bana niini nga si Rey Niño Boniel maoy prime suspect sa maong krimen.

Lakip sa nitambong ang 7-anyos nga anak nga lalaki ni Boniel, igsuon niya nga si  Merlita Bendong ug suod nga higala nga si Angela Leyson kinsa maoy kauban dihang nahitabo ang pagdagit sa biktima.

Ang mga nitambong sa kalihukan nisakay kini og pump boat lakip na ang usa ka pastor kinsa nipahigayon og mga pag-ampo ug dayon gisunod ang paghalad og mga buwak.

Sa kasamtangang kalamboan  sa kaso si Judge Ferdinand Collantes sa Branch 54  sa  Regional Trial Court (RTC)-7  nga nagbase sa Dakbayan sa  Lapu-Lapu City  ang ni-inhibit sa maong kaso.

Ang kaso batok kang Rey Niño ug sa laing unom ka tawo ang nagkinahanglan pa nga  ma-raffle  pag-usab ngadto sa laing huwes. (/BDB)(BANAT NEWS)