Kapolisan sa Mandaue mobantay sa mga tunghaan

CEBU, Philippines — Higpit nga bantayan sa kapolisan sa Mandaue City Police Office (MCPO) ang mga publikong tunghaan sa paghatag og seguridad sa kabataan nga mosulod sa unang adlaw sa klase karong adlawa.

Kini subay sa mando ni MCPO Director Police Colonel Julian Entoma ngadto sa iyang mga hepe sa unom ka presinto. Matud ni Police Staff Sergeant Mervin Candido nga magsugod sa alas 6 sa buntag ang pagdestino sa mga polis sa mga publikong tunghaan aron pagsanta sa mga dautang elemento nga mopahimulos sa kahigayunan.

Dugang ni Candido nga hangtud sa hapon sa pagpamauli na sa mga nagtungha nga kabataan ang pagbantay sa mga polis ug ang pag-abag sab sa mga traffic enforcers sa pagpahapsay sa dagan sa mga sakyanan ingon man ang paggiya sa paglabang sa dalan sa kabataan.

Si Candido niingon nga ang unom ka presinto sa kapolisan sa MCPO ang adunay mga tunghaang publiko nga naglakip sa elementary ug high school nga mao usab ang destinohan sa duha ka polis.

Gitataw ni Candido nga kun hingpit na nga nakagawas sa ilang mga tunghaan alang sa ilang pagpamauli ang kabataan, taposon sab sa kapolisan sa ilang pagbantay sa lugar. (BANAT NEWS)