Dump truck gidauban

CEBU, Philippines – Nagkaanam og ka-tensyonado ang umaabot nga piniliay dinhi sa Dakbayan sa Sugbo nunot niining mga pasangil nga matud pa pagpanghasi ngadto sa mga kaalyado ni Cebu City Mayor Tomas Osmeña.

Ang mayor nisuwat na sa Comelec nga ipaubos ang siyudad sa Comelec control karong umaabot nga piniliay.

Kagahapon sa kaadlawon, giingong gidauban sa mga wala mailhing mga lalaki ang dump truck ni Bonbon Barangay Captain Eduardo “Eddie” Cabriana.

Si Senior Fire Officer 1 Renato Borres, Investigator sa Cebu City Fire Station mibutyag nga  base sa ilang pakighinabi ni Fire Officer 1 Clyde Cabriana, anak sa kapitan, nakakita ang igsuon niini nga giduslitan ang ilang mga dump truck sa mga dili mominos napulo ka tawo nga nagsakay sa walo ka motor.

Sumala pa ni Borres, duha sa tulo ka mga dump trucks ang nisiga kay gibuboan og gasolina ug giduslitan maayo nalang nga napawong ra sa mga tawo.

Apan si Borres miingon ilaha pa kining imbestigahon ug ipatawag ang mga nakasaksi. Usa pa, walay bomberong nakaresponde tungod kay giingong alas-12:55 sa kaadlawon nahitabo apan hapit na alas-8 sa buntag sila gitawgan sa mga tagtungod.

Si Kapitan Cabriana sa iyang bahin nitug-an nga wala siyay kontra sa ilang lugar  apan siya nagdudang politika ang hinungdan kay kaalyado siya sa mayor.

Samtang ang pangulo sab sa General Services Office (GSO) Ronaldo Malacora mipasangil nga giestambayan og duha ka patrol cars nga dunay sakay nga mga naka-camouflage nga mga polis ang atubangan sa ilang balay sa Barangay Buot Taop.

Nagtuo siya nga siya maoy tuyo kay siya may gipangita dihang gipangutana sa mga polis ang iyang anak. Nabalaka siya nunot sa mga nangaging mga panghitabo sa mga parehas niyang kaalyado sa BOPK.

Namasangil sab siyang ang patrolcar didto sab makit-i mag-estambay sa satellite headquarters sa Partido Barug.

Ang executive secretary sab sa mayor nga si Catherine Yso namasangil sab nga gibato sa wala mailhing mga tawong nagsakay og motor ang ilang balay diha sa Basak San Nicolas kagahapon sa kaadlawon. Sama sa uban, politika sab ang iyang gituohang hinungdan.

Sa press conference ni Osmeña kagahapon mipahimangno sa mga Sugbuanon nga mas mograbe pa gyud kini.

“This matter is escalating to a point which is endangering life and property and apparently it will get worst. We want to assure that this will not hamper, it will not hamper our resolve to maintain Cebu free from terrorism. We have terrorism from the police,” pasalig ni Osmeña.

Sa pikas bahin, nadawat na sa Commission on Elections Cebu City niadtong Miyerkules ang suwat sa mayor nga nag-request nga ipaubos sa Comelec control ang dakbayan tungod sa gihulagway niining “intense politically motivated election-related incidents.”

Ang suwat gipadala ngadto nila ni South District Election Officer Atty. Marchel Sarno ug North Disitrict Election Officer Atty. Chauncey Boholst.

Diha sa suwat gipasanginlan sa mayor ang mga personnel sa Cebu City Police Office nga nagbuhat og dili maayo sa ilang grupo sama sa gihulagway niyang irregular nga pag-serve og search warrants sa mga local officials nga iyang mga kaalyado ug ingon man ang matud pa pagpangrakrak sa mga kabalayan ug pagpang-harass ngadto sa iyang mga sakop sa mga naka maskarang mga tawo.

“The message of all these violence is clear – my opponents will do anything and everything to win the local elections, even if it will cost the lives of innocent Cebuanos. From illegal search of houses and violent shooting incidents, the police officers intensified their abuse of power by violating several Constitutional rights in the conduct of police checkpoints,” tipik suwat sa mayor.

Si Sarno miingon nga ilang ipadala ang suwat ni Osmeña ngadto sa Comelec-Manila alang sa evaluation. Apil sa ilang ipadala ang reklamo sab ni CCPO director Royima Garma batok sa mayor ngadto sa Comelec.

“Karon (kagahapon) nato i-forward kay naa man pud sila’y Memorandum coming from our Provincial Supervisor to comment. So our comment is that ipadala namo ang complaint ni Garma against mayor unya also the complaint of Mayor against the police,” asoy ni Sarno.

Giawhag ni Sarno ang mga kandidato nga karon palang angay nang mangandam kun unsay resulta sa piniliay.

“Atong panawagan sa kandidato is, total hapit naman ang election they should prepare themselves modaog man o mapildi. Kay nidagan man sila hope they will accept unsay verdict sa mga tawo come election day,” ni Sarno pa. (Rowena Capistrano/IBM)(BANAT NEWS)