Mandaue manghatag og hinabang sa mga estudyante

CEBU, Philippines – Makadawat og pinansiyal nga hinabang ang mga tinun-an sa publikong tulunghanan nga mogradwar sa elementarya ug segundarya karong tuiga sa Dakbayan sa Mandaue.

Tumong niini nga matabangan ang maong mga estudyante nga makapadayon sa ilang pagtungha sa pagbukas na usab sa klase.

Ang konseho sa siyudad nipalabang og resolusyon niadtong Abril 8 niining tuiga kabahin sa maong paghatag og pinansiyal nga hinabang sa nahisgutang mga estudyante.

Si Bise Mayor Carlo Fortuna ang nangamahan sa draft resolution Numero 240-2019  nipasabot nga ang paghatag og pagtugot nga kahatagan og pinansiyal nga hinabang ang mga tinun-an maoy nagsilbing garantiya ubos sa educational assistance.

Matud ni Fortuna nga makatabang usab kini sa mga ginikanan sa mga tinun-an nga makuha-kuhaan ang ilang galastohan sa pagpatungha sa ilang mga anak.

Ang mga nigradwar moanha lang kini sa ilang tagsatagsa ka barangay hall alang sa kasayuran o pagkuha sa ilang mga pinansiyal nga hinabang. Ang mga makabenipisyo makadawat og P3,000 matag usa kanila.

Dugang ni Fortuna nga si Mayor Luigi Quisumbing niawhag usab kanila pinaagi sa pagpadala og suwat alang sa pagpalabang og resolusyon paghatag og hinabang sa nahisgutang mga tinun-an. (/BDB)(BANAT NEWS)