Sanitary landfill sa Binaliw gibuksan na
CEBU, Philippines — Gibuksan na ang sanitary landfill ug material recovery facility sa Barangay Binaliw sa Siyudad sa Sugbo human giaprobahan sa Cebu City Environment and Natural Resources Office ang accreditation niini isip usa ka service provider alang sa solid waste disposal.
Si Ma. Nida Cabrera, pangulo sa CCENRO nibutyag sa Banat News nga ang Solid Waste Management Board (SWMB) nihatag na og pagtugot sa ARN Builders Inc. nga mosugod na pagdawat og mga kliyente niadtong Marso 4.
Kahinumduman nga sa niaging bulan ang ARN nagproseso sa iyang accreditation gikan sa CCENRO isip pagsunod sa mga environmental law.
Apan sa wala pa aprobahi ang accreditation ang SWMB nga gipangulohan ni Cabrera nisusi sa mga dokumento sa ARN ug sa pasilidad.
Ang SMWB gilangkuban sa mga representante gikan sa Department of Public Services, City Council ' s committee on environment, Department of Science and Technology, Environmental Management Bureau, publiko nga sektor ug uban pa.
Base sa mga impormasyon nga nadawat ni Cabrera ang ARN nagdawat sa mga basura sa Dakbayan sa Mandaue.
Niabot ngadto sa 10-ektarya ang kinatibuk-ang gilapdon sa sanitary landfill diha sa bukirang barangay.
Dugang ni Cabrera nga ang iyang team mopahigayon sa inspection sa dapit sa matag 15 ka adlaw aron sa pagsiguro nga ang ARN nituman sa environmental laws. (BANAT NEWS)
- Latest
