Kawani sa Mandaue City Hall sakpan nagdala shabu
CEBU, Philippines — Gitanggong sulod sa detention cell sa kapolisan sa Presinto 1 sa Mandaue City Police Office (MCPO) ang usa sa mga kawani nga lalaki sa Mandaue City Hall uban usab sa angkas niini nga nadakpan sa checkpoint niadtong miaging kadlawon.
Si Chief Inspector Aldrin Villacampa nga maoy hepe sa Presinto 1 sa MCPO maoy nangulo sa gipasiugdahan nilang COMELEC checkpoint sa A. Soriano Avenue sa Barangay Centro sa Dakbayan sa Mandaue.
Atol sa ilang checkpoint, usa ka nagpailang empleyado sa Mandaue City Hall nga nadistino sa treasurer’s office nga si Niel Huezan Cabahug, 42 anyos nga taga Zone Agbate, Barangay Paknaan sa maong dakbayan, ang nakuhaan og tulo ka gagmay nga paketeng shabu.
Matud pa ni Police Officer 3 Angelo Arnaiz nga angkas ni Cabahug nga si Pompio Lufranco, 32 anyos, nga taga Barangay Ibabao sa maong dakbayan ang nakuhaan usab og mga drug paraphernalia nga maoy hinungdan nga lakip kini sa ilang gidakop. Dugang pa ni PO3 Arnaiz nga gikan sa Dakbayan sa Sugbo ang duha ka dinakpan nga ilang gituohang gikan pa kini nga namalit og shabu sa maong dakbayan nga maoy sagad sa gitug-an sa ilang madakpan sa pagahimoon nilang checkpoint sa maong lugar. .- /LPM (BANATNEWS)
- Latest