Labitad padayong gipangita
CEBU, Philippines — Gitug-an sa hepe sa kapolisan sa Siyudad sa Talisay nga wala mibiya sa kabukiran ang ilang gipangita nga si Jerome Labitad, kinsa daghan na og atraso.
Si PSupt. Marlu Conag, hepe sa Talisay City Police nagkanayon nga walay laing kapaingnan si Labitad gawas lang diha sa iyang lugar sa Barangay Campo 4.
Matud niini nga kon mogawas sa iyang gitaguan si Labitad diha na gyud siya madakpan.
Si Labitad ang notadong durugista, tulisan ug gun for hire nga bag-o lang nakigpinusilay sa mga sakop sa Provincial Intelligence Branch (PIB) sa Cebu Provincial Police Office (CPPO).
Basi sa taho sa PIB nga naigo si Labitad hinungdan nga nisibat kini ug gibilin ang ilang armas uban sa iyang uyuan nga si Felix Abacajan Jr. ug laing kauban.
Si Conag mitataw nga anad kaayo sa ilang lugar si Labitad hinungdan nga dili sab siya basta-basta nga masulod.
Hinuon nagtuo siya nga anaa ra gyuy katapusan ang pagtago-tago niini uban sa iyang grupo.
Iyang giawhag ang mga lumulupyo sa lugar nga unta makig-alayon kanila aron madakpan ang maong grupo nga nanghasi sa kabukiran sa Talisay aron ang ilang mga kabalaka mawagtang na. (/DILT)(BANATNEWS)
- Latest
