Usa ang patay sa drug bust

CEBU, Philippines — Patay ang gipasanginlang notadong tulisan ug tigpayuhot og ilegal nga drugas samtang tulo ang nasikop atol sa operasyon didto sa Purok 4, Barangay Jaclupan, Dakbayan sa Talisay kagahapon sa buntag.

Apan ang kauban sa napatay maoy nakasibat nga nagsige pa og panghagit sa operatiba pinaagi sa pagpabuto sa iyang armas didto sa atbang nga bukid.

Ang namatay nailhan nga si Dexter Rabago, 43, nagpuyo sa maong dapit.

Samtang ang nakasibat nga nagsige og pamusil sa mga polis sa pikas bungtod mao si Willy Labitad.

Nasikop sab nga nagduwa og gambling machine si Levin Doronia ug ang amahan ug anak nga maoy caretaker sa karerahan.

Si Sr. Insp. Alejandro Batobalonos sa Provincial Intelligence Branch (PIB) nagkanayon nga dunay nakatug-an kanila kalabot sa ilegal nga kalihukan ni Rabago ug Labitad hinungdan sa pagpahigayon nila og operasyon. Una nilang gisulod ang panimay ni Rabago nga mao ang ilang gikasabot sa pagpalit og ilegal nga drugas. Nagtuo silang naa sab si Labitad sa lugar ni Rabago apan wala kini didto.

Nipabuto sa iyang armas nga .45 si Rabago hinungdan nga nibawos ang operatiba hangtud nga siya naigo.

Wala maglangay ang otoridad gilahos nila ang karerahan nga dili layo sa pinuy-anan ni Rabago hangtud nga ilang naabtan si Labitad apan nakasibat kini samtang nagpunay og pabuto sa iyang armas ngadto sa mga polis.

Tulo ka ilegal nga makina ang nasakmit ug ilegal nga drugas ingon man drug paraphernalia ang nakuha gikan sa napatay ug dinakpan. Si Rabago ang suspek sa pagtulis ug pagdunggab sa usa ka taxi drayber  kaniadto apan wala lang napadayon ang kaso. Samtang si Labitad maoy uyuan sa giila nilang High Value Target (HVT) sa pagpamaligya og ilegal nga drugas nga si Jerome Labitad. (/IBM)(BANATNEWS)