Cebu Province makadawat og pahalipay
CEBU, Philippines — Usa ang Probinsiya sa Sugbo ang gipasidunggan sa Department of Interior and Local Government (DILG) tungod sa maayong performance niini pagbatok sa ilegal nga drugas.
Ang Kapitolyo pinaagi sa Cebu Provincial Anti-drug Abuse Office (CPADAO) mao ang hatagan sa National ADAC (Anti-Drug Abuse Council) Performance Award.
Ang ADAC Performance Audit mipahigayon og “national calibration” niadtong Disyembre 10 ngadto sa petsa 12 aron mahuman ang pag-audit subay sa gihimong evaluation sa performance ug functionality sa mga ADAC sa nagkadaiyang local government units sa tibuok probinsiya.
Ang resulta subay kini sa gihimong audity pagsuta kon naglihok ba pag-ayo ang mga ADAC.
Matud ni Ivy Durano-Meca ang pangulo sa CPADAO nga apil sa gitan-aw sa audit team mao ang pundo alang sa buhatan ug ingon man paggamit niini alang sa mga programa subay sa plan of action; ang innovation nga gihimo sa buhatan; barangay drug clearing; drug affectation sa lugar ug lakip na usab ang assistance nga teknikal ug pinansiyal ngadto sa mga munisipyo ug barangay.
“Out of 1, 715 provinces, cities, and municipalities, 241 LGUs garnered 85-100 points corresponding to an adjectival rating of ideal high functionality” pagbasa sa memorandum sa DILG nga gipadala ngadto sa CPADAO.
Dugang ni Meca nga ang maong pasidungog nagpasabot nga gihimo sa CPADAO ang ilang trabaho. Ug matud niya nga nagpakita usab kini nga ang pag-umol sa CPADAO dili tungod sa propaganda. Ang labing unang ADAC Performance Award ipahigayon didto sa kaulohan karong umaabot nga Disyembre 28, 2018. (BANAT NEWS)
- Latest















