‘Barangay kapitan’ nag-viral sa Facebook
CEBU, Philippines – Usa ka giingong barangay kapitan sa lungsod sa Medellin gireklamong nanulong kauban ang armadong lalaki aron papahawaon ang mga residente sa usa ka luna sa Barangay Opao, Purok Gumamela, Dakbayan sa Mandaue kagahapon sa buntag.
Ang maong insidente nag-viral sa social media nga gi-post sa usa ka Jen Surds sa Facebook nga miani og mga komento gikan sa mga netizens. Ang maong video niabot na og 4500 ka shares, 234 ang nikomento ug 655 ka reactions sa mga nakabasa pag alas 6:30 sa kagabii.
Ang gireklamong lider sa 20 ka armadong gwardiya giingong barangay kapitan didto sa lungsod sa Medellin kansang pangalan gipugngan una sa Banat News hangtud nga way kompirmasyon.
“Nangayo ni ug assistance ang mga taga didto kay pagtawag nila naa daw trouble ug gipa alarmahan namo sa amoang personnel. Pero pag-abot sa area wala na ang alleged nga barangay kapitan ug iyang mga armadong kauban sa maong insidente. Ug gapaabot rapud mi sa complainant na mo file og kaso kay pasakahan namo og kaso," matud pa ni SPO1 Rey Patigas, Police Officer sa Barangay Opao, Police Station 5.
Ang caption sa video nagkanayon nga gusto silang palayason gikan sa gitarokan sa ilang mga balay. Sumala pa usab niini, nga nagung-ong pa sa korte ang kaso bahin niini.
Makita sa video nga nagpadistansya ang mga tawo sa maong mga armado ug nagkainitay og tinubagay ang duha ka kampo. Ang kapolisan sa Mandaue maghimo pa og imbestigasyon sa maong hitabo ug miawhag sa mga residente sa lugar pagpasaka og reklamo. - /IBM (BANAT NEWS)
- Latest
