Tulo laway’ sa Fuente gidunggab patay

CEBU, Philippines — Patay ang usa ka lalaki nga giingong adunay deperensya sa pangisip human kini gidunggab sa wala mailhing mamumuno sulod sa Fuente Osmeña Rotunda, Capitol Site, Dakbayan sa Sugbo niadtong Huwebes sa gabii.

Ang biktima naila nga si Junfyl Figueras, 34, taga Catarman, Lungsod sa Liloan.

Ang biktima unang nailhan sa pangalan nga “tulo laway” apan personal kini nga giila sa iyang igsuon ug gikuha usab kini sa punerarya diin kini gidala.

Nasayran sa Banat News nga kanhi piniriso ang biktima ug dili pa lang usab kini dugay nakagawas sa prisohan.

Matud ni Police Inspector Gumersindo Mandawe, deputy officer sa Abellana Police Station, nga giingong dunay gikalalis ang biktima nga mga batan-on ug pipila ka gutlo mao nalay nakit-an sa mga tawo sa lugar nga nahagba na kini ug nabulit sa dugo.

Sumala pa sa mga tawo sa lugar nga wala silay kasikas nga nadunggan sa lugar.

Nagtuo si Mandawe nga na-tripan ang biktima o kaha may gikaaway kini kay masuko man kini kung dili mahatagan kung kini mangayo. (/GMR)(BANATNEWS)