Naligo uban sa mga classmate nalumos

CEBU, Philippines — Usa ka 17-anyos nga tinun-an sa grade 10 ang nalumos diha sa Barangay Dunggoan, Dakbayan sa Danao niadtong Byernes sa buntag samtang naligo kini sa dagat uban sa iyang mga classmate.

Ang nalumos giila sa kapolisan nga si Rongie Roble, tinun-an sa grade 10 ug residente sa maong barangay. Si Police Officer 1 Gypsy Miro sa Danao City Police station nibutyag nga gi-report sa inahan sa maong bata nga naligo kini sa dagat kauban sa iyang mga classmate.

Giingong samtang nangaligo naanod si Roble tungod sa kakusog sa sulog ug walay nakatabang kaniya tungod kay nangahadlok ang ubang kuyog niini nga madala usab sa sulog.

Human sa pagkaanod, si Roble nawagtang sulod sa pipila ka minuto ug wala nay panimuot  dihang milutaw na kini.  Si Roble daling gidala sa iyang mga kauban diha sa duol nga tambalanan apan gideklara kining patay na pag-abot sa tambalanan.

Ang kapolisan sa siyudad nagpahigayon og follow-up nga imbestigasyon sa insidente pagsuta kong wala bay foul play. (BANAT NEWS)