Central Visayas gipaubos sa red alert

CEBU, Philippines — Gibutang sa red alert status ang seguridad sa rehiyon siyete nunot sa nahitabong pagpamomba didto sa Isulan, Sultan Kudarat niadtong Domingo.

"As of now, we are checking on our end kung naa ba mi na-monitor. So far wala pay nakita. We are just certain nga hopefully di pa makaabot sa atoa,"si Chief Supt. Debold Sinas, direktor sa Police Regional Office-7 nagkanayon atol sa press conference kagahapon.

Butyag ni Sinas nga ang pagbutang sa red alert status, mando gikan sa kadagkoan sa Philippine National Police nunot sa maong ikaduha na nga pagpamomba didto sa Sultan Kudarat taliwa sa gipatumang martial law didto. Giingong karong semanaha magpulong sila kauban ang National Intelligence Coordinating Agency (NICA) uban sa mga intelligence community aron magbayloanay og intelligence reports. Sa pagkakaron, gitug-an ni Sinas gipangusgan ang police visibility ilabi na sa mga Roll-on/Roll-off (RORO) ports ug sa mga pantalan nga luag ra ang seguridad.

Butyag sa maong heneral nga nakatabang sab sa ilang intelligence gathering ang dinakpan nga si Oger Roma Pelonio, ang 69 anyos nga lalaki kinsa gituohang membro sa teroristang grupo nga Abu Sayyaf.

Gidakop si Pelonio human makuhai og mga armas ug granada atol sa pagsilbi og search warrant sa mga sakop sa Criminal Investigation and Detection Group 7 didto sa Barangay Ocaña sa Dakbayan sa Carcar niadtong Agosto 16 karong tuiga.

"Balik Islam siya. Accordingly, sa iya wa kaayo siya misulti sa iyang involvement. Iya lang gi-confirm nga naa siyay mga amigo nga ingon ana. As to the plan nga naa bay plano diri sa Central Visayas, wala siyay giestorya," butyag ni Sinas.

Ang maong heneral nanawagan sa publiko nga mosumbong dayon sa kapolisan kon adunay kadudahan sa ilang palibot ilabi na sa mga bag-ong salta sa ilang lugar.

Niadtong Domingo, duha patay ug 12 ka  nangaangol pag-ulbo sa bomba didto sa Isulan alas 7:30 sa gabii. Nahitabo kini duol sa usa ka mall.

Lima ka adlaw usa sa maong panghitabo, Agosto 28, usa ka improvised explosive device (IED) ang niulbo atol sa Hamungaya Festival.

Tulo ang namatay dihadiha dayon lakip na ang usa ka siyete anyos nga batang lalaki.

Gipaubos ni Presidente Rodrigo Duterte sa martial law ang tibuok Mindanao niadto pang Mayo 23,2017 nunot sa Marawi siege ug kaduha na kini na-extend, una niadtong Disyembre 31,2017 ug sunod karong Disyembre 31,2018. (BANAT NEWS)