Lalaki nalatayan sa trak patay

CEBU, Philippines — Patay ang usa ka 39- anyos nga lalaki human nalatayan sa usa ka 10-wheeler nga dump truck sa Sitio Sto. Niño Barangay Sta. Cruz, Lungsod sa Balamban kagahapon sa buntag.

Giila ang biktima nga si Francisco Maglasang Laag, taga Sitio Polo, Baliwagan sa nahisgutang lungsod.

Samtang ang drayber sa trak giila nga si  Richard Cañete Olivar, 29, taga Sitio Bantaaw, Cayang sa Dakbayan sa Bogo.

Matud ni Police Officer 1 Teofilo Verano Jr., duty nga desk officer sa Balamban Police Station nga ang trak gikan sa Dakbayan sa Bogo ug paingon unta sa habagatan.

Pag-abot sa nahisgutang lugar nilabang  ang biktima apan wala kini makabantay sa trak hinungdan nga napasok kini sa ilawom ug nalatayan hinungdan sa iyang kamatayon.

Gikustodiya karon sa kapolisan ang drayber sa trak  samtang giandam na ang kaso batok kaniya. (/IBM)(BANATNEWS)