TCJ bisan huot na manawat gihapon og priso
CEBU, Philippines — Ang Talisay City Jail bisan og huot na kaayo kini apan padayon gihapon silang manawat og mga piniriso matud ni Chief Inspector Mary Jane Inopia, jail warden sa maong prisohan.
Giingong walay kalahian ang ilang pasilidad ngadto sa uban gumikan sa padayong pagsulod sa mga tawo nga adunay kalapasan sa balaod.
Si Inopia nagkanayon nga bisan og huot na ang ilang pasilidad wala siyay mahimo kundi sa pagdawat sa mga binilanggo ilabi na nga aduna kini court order.
Sa pagkakaron aduna silay 792 ka binilanggo nga pulos lalaki diin sobra kini sa katunga sa tukmang gidaghanon nga masulod sa pasilidad.
Hinuon padayon ang pagtrabaho karon sa bag-ong building diin upat kini ka andana ug langkuban walo ka selda matag andana.
Ang maong building giingong dili sama sa kasamtangan nilang prisohan karon nga cottage type sama kini sa traditional nga prisohan.
Matud usab ni Inopia nga mapuslan ang bag-ong edipisyo karong tuiga apan kong padayon gihapon ang pagsulod sa mga binilanggo posibleng maghuot usab kini.
Dugang ni Inopia nga ang padayong paggukod sa mga tawo nga nalambigit sa ginadiling drugas ang nakatampo og dako sa paghuot sa prisohan. (/BDB)(BANATNEWS)
- Latest
