Mayor esgana gikasohan, wa motabang sa gipusil

CEBU, Philippines —  Dugang kaso ang gipasaka batok kang Santa Fe Mayor Jose Esgana may kalabutan sa pagpatay sa kanhi niya sinaligan sa politika atubangan sa iyang panimaye niadtong Mayo 7, 2016.

Si Josefina Delima, inahan ni Gilbert Delima, ang nisang-at og kasong administratiba batok kang Esgana nunot sa giingong walay gihimo nga masikop ang mamumuno samtang diha siya atol sa hitabo.

Gihangop hinoon ni Esgana ang gipasakang reklamo isip katungod sa usa ka inahan nga nangita og hustisya sa kamatayon sa anak samtang katungod sab niya ang pagtubag sa tukma nga lugar.

Una nang nipasaka og kasong kriminal si Josefina batok kang Esgana sa buhatan sa Ombudsman usa ka semana na ang nakalabay sa giingong pagpamakak niini nga diha siya sa hitabo.

Apan ang testigo nga si Jake Hijapon nitumbok kang Pablo Paul Escarlan, bayaw ni Esgana, nga maoy nipusil lima ka higayon kang Gilbert ug maoy niguyod sa lawas sulod sa gate sa balay sa mayor.

Matud ni Hijapon nga atol sa hitabo diha si Esgana ug anak niini nga si Joanes Paulo Esgana duol sa lawas ni     Gilbert.

Sa imbestigasyon sa kapolisan nakompirmar nga giguyod ang patay’ng lawas ni Gilbert sulod sa gate sa balay sa mayor.

Matud ni Josefina nga human sa hitabo wala gyud nakatawag og ambulansiya si Esgana ug nakahigayon pagsibat ang mamumuno.

Sa affidavit ni Esgana niadtong Oktubre 10, 2016 kini niingon nga didto siya sa sulod sa balay kauban ni Escarlan dihang nakadungog sila og sipa nga boto sa armas hinungdan nga dali sila nga nihapa ilawom sa lamesa.

Ang maong pamahayag ni Esgana ang gibasehan ni Josefina sa pagpasaka og kasong criminal batok sa mayor ug gisuportahan sa affidavit ni Hijapon.

Agosto 25, 2016 napasaka sa National Bureau of Investigation ang kasong murder batok ni Escarlan ug Joanes Paulo.

Apan Disyembre 7, 2016, si Prosecutor Rustom Presas Jr. nisang-at sa kasong homicide batok kang Escarlan samtang gibasura kang Joanes Paulo.

Si Josefina nisang-at og petisyon aron ma-review ang kaso nga anaa pa karon sa Department of Justice.  (BANATNEWS)