Unom sikop sa checkpoint, may shabu
CEBU, Philippines — Gidakop sa kapolisan ang upat ka motorista kinsa nadiskubrehan nga nagdala og shabu sa checkpoint sa kapolisan sa Dakbayan sa Mandaue niadtong Domingo sa gabii.
Ang hepe sa Presinto 2 sa Mandaue City Police Office, Senior Police Officer 1 Michael Limalima niila sa dinakpan nga si Robenito Casinillo Rondiano, 38, kinsa nasakmitan og usa ka gamay nga pakete sa shabu.
Si Police Officer 2 Jerome Pontillas sa Presinto 3 sa MCPO niila sab sa ilang nadakpan nga sila si Dave Bensulan, 32, taga Cordova, Jonathan Bischos, 23, ug John Kay Lumakang Malinao, 30, taga Mustang, Pusok, Dakbayan sa Lapu-Lapu kinsa sakay sa ilang motorsiklo ug nilabay sa checkpoint sa dalan Zuelleg, Subangdaku, Dakbayan sa Mandaue. Matud ni Pontillas nga si Bensulan ilang nakuhaan og mga drug paraphernalia ug si Malinao ug Lumakang nakuhaan og tagsa ka pakete sa shabu.
Samtang duha ka lalaki nga nasita sa checkpoint ang gisikop human sila nakuhai og ilegal nga drugas sa Rabaya St., Cansojong, Dakbayan sa Talisay niadtong Domingo sa hapon.
Ang mga dinakpan nailhan nga sila si Juvie Padilla, 39, taga Tunga, Barangay Tanke, ug si Nhero Capacite, 36, taga Riverside, Barangay Sangi, Siyudad sa Toledo.
Matud ni Supt. Marlu Conag, hepe sa kapolisan sa Dakbayan sa Talisay, nga nakahigayon sila og sita sa duha kay wala’y helmet samtang nagmaneho og motorsiklo ingon man walay lisensiya.
Giingong kadudahan ang lihok sa duha hangtud nasakpan ang daku nga pakete sa shabu gikan ni Padilla samtang tulo ka gagmay nga pakete kang Capacite nga balor og P119,069.92. (BANAT NEWS)
- Latest
