Negosyante gipusil patay sa Minglanilla

CEBU, Philippines — Usa ka 67-anyos nga negosyante ang gipusil patay sa wala mailhing mga tawo sa sulod sa merkado sa Barangay Poblacion Ward I, lungsod sa Minglanilla niadtong Biyernes sa gabii. Ang biktima giila sa kapulisan sa Minglanilla nga si Donald dela Calzada, lumulupyo sa maong lugar.

Si Police Officer 2 Jefferson Base, sa Minglanilla Police mitug-an sa Banat News nga ang biktima nakig-inom kauban ang iyang mga amigo sa maong dapit sa dihang adunay niduol nga duha ka lalaki nga pulos nagsuot og ski mask dayon gidul-itan kini sa pagpusil.

Si Dela Calzada nakaangkon og mga samad pinusilan sa nagkalain-laing parte sa lawas hinungdan sa hinanali niining kamatayon.

Si Base midugang nga daling miikyas gamit ang usa ka motorsiklo sa wala pa matino nga direksiyon ang mga mamumuno.

Nagpadayon pa ang ilang imbestigasyon pagtino sa motibo sa pagpamusil sa maong negosyante. Wala hinuon nila gisalikway nga aduna kini kalabutan sa negosyo. (/IBM)(BANATNEWS)