Signal sa kabukiran pakusgan

CEBU, Philippines – Nagkasinabot na ang telecommunication companies kagahapon nga magtinabangay alang sa pagpakatap og cell sites sa mountain barangays sa Sugbo nga makatabang usab sa ipabutang nga bus system sa kabukiran nga proyekto ni Cebu City Mayor Tomas Osmeña .

Ilang gituki ang pagpakusog sa signal sa mga cellphones sa kabukiran tungod kay daghang lugar ang wala ug hinay ang signal.

Ang siyudad magbutang og bus station sa bukirang mga barangay nga mopasakay og mga college students matud pa ni Osmeña.

Sumala pa ni Jessie Alano  kinsa director sa New Projects Department Office sa Globe Telecom, Inc., makigtinabangay sila sa Smart alang niini nga proyekto ug aduna na silay plano.

Sa Transcentral Highway magsugod og butang og bus station kada duha ka kilometro matud pa sa mayor. Magbutang usab sa Talamban road ug Pit-os road.

Kahinumdoman nga wa una tugti sa mayor ang pagbutang og cell sites sa downtown area tungod ganahan kini nga unahon usa ang pagpakatap og cell sites sa kabukiran. (Katrina Aguirre /IBM)(BANAT NEWS)