Way eleksyon sulod sa prisohan

CEBU, Philippines – Kinahanglan ang pagtugot gikan sa korte aron makabotar ang usa ka piniriso sa umaabot Barangay ug Sangguniang Kabataan (SK) Elections.

Matud ni Atty. Lionel Marco Castillano, ang provincial election supervisor sa Sugbo, nga dili mopahigayon og eleksyon sulod sa prisohan tungod kay adunay temporary restraining order (TRO) ang Korte Suprema. Si Castillano nagkanayon nga maglisud sab ang mga nagdumala sa prisohan kun ipagawas ang mga piniriso tungod sa seguridad.

Sa laing bahin giawhag sa Commission on Elections sa Dakbayan sa Mandaue ang tanang kandidato sa pagbutang lang sa ilang campaign materials sa giila nga common poster area.

Si Evelyn Cueva, City Election Assistant, niingon nga ang mga giila nila nga common poster area nahimutang lang sa mga barangay halls.

May tukmang gidak-on sab nga gitugot ang Comelec nga ang matag poster dili molapas sa 2x3. Mahimo nga mobutang ang mga kandidato sa mga bongbong sa mga balay ug pribadong luna kung adunay pagtugot sa tag-iya.

Si Cueva niingon nga ilang ipatangtang ang poster nga wala sa saktong lugar. (Romeo T. Limpangog/GMR)(BANAT NEWS)