PNP, AFP gipahimangnoan

CEBU, Philippines – Nipahimangno ang Commission on Elections (COMELEC)  sa mga sakop sa kapolisan ug militar nga madestino sa mga voting centers bawal mosulod 50 metros sa mga lawak botaranan atol sa Sangguniang Kabataan (SK) ug Barangay Elections.

Matud ni provincial election officer Ferdinand Gujilde kon makita sa mga electoral board nga kinahanglang mopaduol ang mga polis ug militar kinahanglang mosuwat  ang electoral board sa PNP.

"They are not allowed  to converse to the voters and they are not allowed to block the voters from entering the polling place unless probably bayolente ang botante," matud ni Gujilde.

Bisan ang mga opisyal sa barangay, ma elected man o appointed, bawal sila mopaduol sulod sa 50 metros gikan sa polling place gawas lang kung mobotar. Bawal usab mangampanya anang adlawa. Ang molapas mamahimong mag-atubang og electioneering case.

Sa pikas bahin, moabot na og 22,886 ang nakaduso og sertipiko de kandidatora sa lalawigan sa Sugbo sukad sa pagsugod sa filing niadtong Sabado hangtod niadtong Miyerkules.

Ang 1,693 niini pagka kapitan, 12,880 ang konsehal, 1,342 ang SK ug 6,971 ang SK member. (/IBM)(BANAT NEWS)