P89.3 M danyos sa baha sa Toledo

CEBU, Philippines — Mikabat ngadto sa P89.3 milyones ang kinatibuk-ang danyos sa dakbayan sa Toledo  tungod sa nasinating pagbaha niadtong bisperas sa bag-ong tuig.

Ang maong danyos gilangkuban sa P46.6 milyones nga kadaot sa inprastraktura P30.4 milyones sa agrikultura ug P11.3 milyones sa pribadong establisamento.

Sa 38 ka barangay sa siyudad 17 niini ang nakaangkon og kadaot sa inprastraktura ug agrikultura.

Ang mga barangay nga nakaangkon og mga kadaot gilangkuban sa Matab-ang, Talavera, Dumlog, Sangi, Daanglungsod, Luray Dos, Poblacion, Ilihan, Carmen, Ibo, Tubod, Cabitoonan, Canlumampao, Bato, Landahan, Magdugo ug Awihao. Base usab sa gipahigayong assessment ni Engineer Alexander Abella sa City Disaster Risk Reduction Management Office nga 861 ka indibidwal sa 204 ka pamilya ang naapektuhan sa grabeng pagbaha.

Ang kagamhanan sa siyudad mipagawas og pasiunang P78 mil nga pundo nga gigamit sa pagpamalit og pagkaon ug mga butang nga magamit sa mga biktima.

Gawas niini ang City Social Welfare and Development (CSWD) mihatag na kini og mga relief goods ngadto sa mga biktima. Subay usab sa assessment ang kagamhanan sa siyudad pinangulohan ni City Acting Mayor Antonio Yapha, Jr. mideklara og state of calamity sa siyudad. (BANAT NEWS)